• Ataraira Cameron

E matatauhia ana a Harry. Naa, tuutaki ki a Hare


I tērā tau i whakaputahia e whā ngā pukapuka tuatahi a te kaupapa Kotahi Rau Pukapuka. Nā tokowhā ngā kaiwhakamāori waingōhia i whakamāori, tuhi rānei, ēnei pukapuka whai tikanga. I pānuitia tētahi pukapuka rongonui e Ataraira Cameron, ā, nāna i tuhi tēnei kōrero.


Hare Pota me te Whatu Manapou, nā J.K. Rowling, nā Karena Kelly i whakamāori. (Kotahi Rau Pukapuka/AUP)


Ko te Kotahi Rau Pukapuka Trust tētahi rōpu e whakahaere ana i te whakamāoritanga o ngā pukapuka 100, ā, ko ​Hare Pota me te Whatu Manapou​ tētahi. I hau mai te rongo ki aku taringa mā te whakamāoritanga nei ā i pupū ake ngā kare-ā-roto rangirua i roto i a au mā te putunga o te pukapuka nei ki te marea, koinei ngā take: tuatahi, he ao matatini te ao o ​Harry Potter​, me tana rongonui i ngā tōpito katoa o te ao, nā reira e whakawhirinaki ana te angitūtanga o te whakamāori nei ki ngā whakaaro a te marea. Tuarua, he aronga matua te mita o ngā pukapuka mā te wheako o te tangata i te pānui pukapuka, ā ko te reo Māori he reo i ngā mita tini, heoi anō he wero nui te ea i ngā hiahia o ngā kaipānui tokomaha, o mita kē. Ā hei whakakapi, nā te pukapuka nei ka whakarerekē i ngā wheako o ngā kaipānui Māori o ​Harry Potter​ hei anamata, ā, nā ngā pukapuka 100 e whakamāori ana ka tīni mārika ngā whaeko pānui pukapuka Māori mā ngā taiohi hei ngā tau e heke mai nei.


I hau mai te rongo ki aku taringa mā te whakamāoritanga nei ā i pupū ake ngā kare-ā-roto rangirua i roto i a au mā te putunga o te pukapuka nei ki te marea, koinei ngā take

Nā ​Leon Blake​ (​Tūhoe, Tūhorangi, Ngāti Wāhiao, Ngāti Whāwhākia, Ngāti Porou, Taranaki, Ngāti Kahungunu, Te Whānau a Apanui​) i whakamāori i a ​Hare Pota me te Whatu Manapou​. He mātanga ia i te reo Māori, ā, e mahi tahi ana ia i tētahi rōpu e whakaora ana i ngā kupu Māori o nehe i tūhura, me te hanga i ngā kupu hou kia whakauru ki te reo Māori o inamata. E whakaaro ana ahau kua tāpirihia e Leon i ētahi o ngā reo hou ki te pukapuka kia whakaako i ngā kupu me ngā ariā nei ki te kaipānui hou.


Torutoru noaiho ngā rauemi ki Aotearoa e aro pū ana ki te wheako pārekareka o te kaipānui, nā te tokoiti o ngā pukapuka Māori he uaua kia kimi pakiwaitara whakaihiihi, ā, ka hōha te kaipānui; he raru tēnei mā ngā tāngata e ako tonu ana i te reo ina kāre he rauemi i te mita nāna ako ai. I taku tamarikitanga i rūmaki aku mātua i a au i taku reo tuatahi, te reo Māori, ā, i kaha rata ahau i ngā “pukapuka pikitia”. I tere tipu taku ngākaunui mō te pānui me ngā pukapuka whakaihiihi, engari i taku taiohitanga ruarua noaiho ngā pukapuka reo Māori pai. I whakaako ahau i a au anō i te pānui reo Pākehā kia whai āheitanga ki ngā pukapuka manomano i rō reo parāoa. Ko ​Harry Potter,​ The Lord of the Ringsme T​he Hobbit​ ētahi o āku pukapuka makau.


Torutoru noaiho ngā rauemi ki Aotearoa e aro pū ana ki te wheako pārekareka o te kaipānui, nā te tokoiti o ngā pukapuka Māori he uaua kia kimi pakiwaitara whakaihiihi, ā, ka hōha te kaipānui...

I taku pānui i a ​Hare Pota​ i whakararu mai ētahi o ngā reo o roto, nā te rerekē o te mita ki tāku ake, me taku kore mōhio i ētahi o ngā kupu hou. Nā ngā pōraruraru nei i pōrahurahu te haere o taku pānui, ā, i uaua māku kia mārama i ētahi o ngā ariā i te pukapuka. E āwangawanga ana ahau tērā pea he taiapa tēnei mā ngā taitamariki Tau 7–10 i te kura. Heoi anō, inā ko ​Hare Pota​ te wheako tuatahi mā te tamaiti Māori i te ao ​Harry Potter​, ākene pea he pai te whakamāoritanga nei. Pēna e ahu ana te pakiwaitara i te aronga Māori, ā, ka pēra te tutakinga ki ngā kiripuaki. Nā taku mōhio kē i te pakiwaitara me āna kiripuaki he rerekē taku pānui i te whakamāoritanga o te pukapuka nei. E noho piritata te ao ​Harry Potter​ ki taku ngākau, nāreira i ahau āku ake whakaaro i taku pānui i a ​Hare Pota​.


...inā ko ​Hare Pota​ te wheako tuatahi mā te tamaiti Māori i te ao ​Harry Potter​, ākene pea he pai te whakamāoritanga nei.

Hei whakakapinga, e mihi ana ki te whakamāoritanga nei, ā, kia ​Leon Blake​ mō tana whakamāoritanga; ka whakatakoto ahau i ngā kupu whakatau ki ngā kaipānui e tiro ana kia tautoro i ōna wheako pānui. He pukapuka rawe tēnei mā ngā tāngata e waea haere ana i te reo, e hiahia ana kia ako kupu, ariā hou hoki. He āheinga rawe tēnei mā ngā rangatahi Māori kia ruku ki te ao pukapuka pakiwaitara reo Māori; nā te whakamāoritanga nei e kī ana te ngākau i te tūmanakotanga mā ngā reanga pānui pukapuka Māori hei anamata. E whakapono ana ahau nā ngā tutukitanga o te rōpu Kotahi Rau Pukapuka ka para te huarahi mā ngā rangatira o āpōpō kia kawe i te kaupapa nei ki angitū. E hīkaka ana ahau kia pānui i te whakamāoritanga e heke mai nei.


Hare Pota me te Whatu Manapou

Nā J. K. Rowling Nā Leon Blake i whakamāori

Kotahi Rau Pukapuka / AUP RRP $24.99

Hokona ināianei

ataraira cameron


He tauira a Ataraira i te wharewānanga o Wikitōria, Te Herenga Waka. He rangatahi Māori ia nō Tauranga Moana. Mai tana tamarikitanga kua aroha ia i ngā pukapuka me ngā pakiwaitara o whenua kē, e ako ana ia i te Cultural Anthropology me te Māori Studies hei te tau nei. E moemoeā ana ia kia tū hei kaihura hei anamata kia tautoko i ngā iwi Māori o Aotearoa.